Qullar kəndində səyyar qəbul keçirilib

Vətəndaş müraciətlərinə həssaslıqla baxılması və qaldırılan məsələlərin diqqətlə araşdırılıb həllinə nail olunması ilə bağlı ölkə Prezidentinin qarşıya qoyduğu vəzifələr Balakən Rayon İcra Hakimiyyəti rəhbərliyinin gündəlik fəaliyyətinin əsasını təşkil edir.
   Yerlərdə vətəndaşların mövcud problemlərini öyrənib həllini sürətləndirmək məqsədilə 28 aprel 2022-ci il tarixdə növbəti səyyar qəbul rayonun Qullar kəndində keçirilib.
   Qəbulda rayon İcra Hakimiyyətinin başçısı İslam Rzayev, hüquq-mühafizə orqanlarının, xidmət təşkilatlarının rəhbər işçiləri və kənd sakinləri iştirak ediblər.
   Qəbulda çıxış edən rayon İcra Hakimiyyətinin başçısı İslam Rzayev son illər ölkəmizdə, o cümlədən regionların sosial-iqtisadi inkişafı Dövlət Proqramı çərçivəsində Balakəndə aparılan abadlıq və quruculuq işləri haqqında kənd sakinlərinə məlumat verib.
   Sonra kənd sakinlərinin müraciətləri dinlənilib. Kənd sakinləri Camaldin Şəkiliyev yaşadıqları küçəyə daş-çınqıl tökülməsinə, Elxan Abdullayev Qullar kəndində 300-dən çox təsərrüfatda 1600 nəfər kənd sakininin yaşadığı ərazidən keçən Hunbul çayda 2 km uzunluğunda sahil bərkitmə işlərinin aparılmasına (məcra təmizləmə), Çingiz Novruzov “Təzə kənd” adlanan ərazidə artezian quyusunun qazıntı işlərinin sürətləndirilməsinə köməklik göstərilməsini xahiş ediblər.
   İcra başçısı müraciətlərin qısa müddətdə araşdırılaraq zəruri tədbirlərin görülməsi üçün qəbulda iştirak edən məsul işçilərə müvafiq tapşırıqlar verib. Vətəndaşlar tərəfindən qaldırılan məsələlərin bir qismi yerində həll olunub, araşdırılmasına ehtiyac olan müraciətlər nəzarətə götürülüb. 
   Vətəndaşlar yerlərdə kənd sakinlərinin müraciətlərinə baxılması üçün belə səyyar görüşlərin keçirilməsindən məmnunluqlarını bildirərək, göstərilən diqqət və qayğıya görə minnətdarlıqlarını bildiriblər.