Dövlət Bayrağı Günü qeyd olundu
Ölkəmizin hər yerində olduğu kimi , Balakən rayonunda da Dövlət Bayrağı Günü yüksək səviyyədə qeyd olundu. Rayon rəhbərliyi, hüquq-mühafizə orqanlarının məsul işçiləri, eləcə də ictimaiyyət nümayəndələri əvvəlcə müasir, müstəqil Azərbaycan dövlətinin memarı Ulu öndər Heydər Əliyevin rayonumuzun ən uca zirvəsində ucaldılmış abidəsini ehtiramla ziyarət etdilər, önünə tər çiçək dəstələri qoydular.
Sonra Balakənli gənclər Azərbaycan bayrağı ilə Heydər Əliyev prospekti boyunca yürüş etdilər.
Bayram tədbirinin rəsmi hissəsi isə rayon Mədəniyyət Mərkəzində keçirildi. İcra hakimiyyətinin başçısı İslam Rzayev geniş məruzə ilə çıxış etdi, üçrəngli Azərbaycan bayrağının sovet dövründə qadağan edilməsinə baxmayaraq məhz Heydər Əliyev Naxçıvan Muxtar Respublikası Ali Məclisinin sədri olarkən onun təşəbbüsü və qəti səyi nəticəsində 1991-ci il noyabrın 17-də Muxtar Respublikanın dövlət bayrağı kimi elan edildiyini bildirdi.
Rayon rəhbərinin çıxışından sonra Azərbaycan bayrağından bəhs edən sənədli film nümayiş etdirildi .
