"12 Noyabr Konstitusiya günü" qeyd olundu

 Noyabrın 12-də Balakən RİH-də Konstitusiya Gününə həsr olunmuş dəyirmi  masa  keçirilmişdir. Rayon rəhbəri İslam Rzayev Azərbaycan Respublikasının  əsas Qanunu barədə ətraflı məlumat verərək  müstəqil Azərbaycanın Konstitusiyasının yaradılmasında Ümummilli liderimiz Heydər Əliyevin böyük əməyini xüsusi  qeyd etdi.
Rayon prokuroru Həsən Mirzəyev, RIH-nin hüquq  şöbəsinin  məsləhətçisi Pirdas Qardaşova və hümanitar və texniki təmayüllü liseyin  tarix  müəllimi Günel Məmmədova çıxış edərək ölkəmizdə demokratik , dünyəvi və hüquqi  prinsiplərin təmin olunmasında, insan hüquq və azadlıqlarının  qorunmasında Konstitusiyanın  əhəmiyyətindən  danışdılar.

Daha sonra bayram günündə  Katex kəndindəki Surağat Qurbani  küçəsinin (Qaybalı oba) sakinləri daha bir yaddaqalan  tədbirin –yol açılışının iştirakçısı oldular. Nəqliyyat Nazirliyinin  vəsaiti hesabına salınmış və uzunluğu  2800 metr olan  asfalt yol həmin gün kənd sakinlərinin istifadəsinə verildi.
Açılış mərasimində iştirak edən rayon İcra Hakimiyyətinin başçısı cənab  İslam Rzayev dedi: -Bu yol bayram günündə sizlərə hədiyyədir.3 min nəfərədək əhalinin  yaşadığı bu ərazidə indidən sonra həm sizin,həm də  nəqliyyatın hərəkəti asanlaşacaq, getdiyiniz yerə tez çatacaqsınız. Ölkə rəhbərliyi başqa sahələrlə yanaşı kəndarası yolların təzələnməsini də daim diqqətdə saxlayır. Bu cür işlər indidən sonra da davamlı olacaq. Sizə başqa bir xoş xəbər də vermək istəyirəm. Bu gündən başlayaraq Qarahacılı yaşayış məntəqəsindəki 1100 metrlik yola da asfalt döşənməyə başlanacaq. Bu iş yerli bələdiyyənin  vəsaiti hesabına görüləcək.
Kənd sakinləri adından çıxış edən Fərhad Qeybullayev bu xeyirxah işə görə ölkə və rayon rəhbərliyinə minnətdarlıq bildirdi.