Beynəlxalq Əlillər Günü qeyd olundu
Hər yerdə olduğu kimi, rayonumuzda da Beynəlxalq Əlillər Günü yüksək səviyyədə qeyd olundu. Həmin gün Balakəndə yaşayan əlillərin bir çoxu “Balakən” şadlıq evində onların şərəfinə düzənlənən tədbirə dəvət edilmişdi. Bu mərasimdə iştirak və çıxış edən rayon icra hakimiyyətinin başçısı İslam Rzayev qonaqları təbrik etdikdən sonra dedi:
-Beynəlxalq Əlillər Günü Ulu Öndər H.Əliyevin sərəncamı ilə 1994-cü ildən qeyd olunur. Onlara diqqət və qayğı hər zaman ölkə rəhbərliyinin diqqət mərkəzindədir. Balakəndə 6217 əlil var. Onların 113-ü Qarabağ müharibəsi əlilidir. Əlillərə qayğı bizim insanlıq, mənəvi borcumuzdur. Bu sahə ilə bağlı dövlətin gözəl sosial siyasəti var.
Rayon ƏSMM-nin direktoru H.Razıyev, sosial müdafiə fondunun Balakən filialının rəis əvəzi Rauf Qaracayev, Qarabağ Veteranları, Əlilləri və Şəhid Ailələri İctimai birliyinin rayon şöbəsinin sədri S.Şibliyev, Mərkəzi Xəstəxananın baş həkimi H.Nuriyev, rayon Ağsaqqallar Şurasının sədri R.Musayev əlilləri bu xoş gün münasibəti ilə təbrik etdilər.
Sonda təbrik üçün meydan rayonun incəsənət ustalarına verildi.
