Novruz Bayramı qeyd olundu

Respublikamızın hər yerində olduğu kimi,  rayonumuzda da xalqımızın  ən qədim  və əziz bayramlarından  biri olan Novruzu  yüksək  səviyyədə  qarşılamaq  üçün  əvvəlcədən  hazırlıq işləri görülmüş,  ayrı-ayrı  kəndlərdə, yaşayış  məntəqələrində  Novruz  ərəfəsində  dörd  çərşənbənin hər biri  el adət-ənənələrinə  uyğun keçirilmiş,  hamı bu  münasibətlə bayram  sevincini  bir-biri ilə bölüşmüşdür.
Martın 19-da rayon  mərkəzindəki Heydər parkında möhtəşəm tədbir keçirilmişdir. Hamı buraya yüksək səviyyədə  təşkil olunmuş Novruz şənliyində  iştirak etmək üçün  yığılmışdı.
Şən, oynaq musiqi  sədaları bayram  iştirakçılarının  sevincini daha da artırırdı. Tədbir iştirakçıları  arasında  rayonumuza  xarici ölkələrdən gəlmiş turistlər də çox idi. Onların hər biri Novruzun  bu cür  yüksək səviyyədə  keçirilməsinə, şadyanalığa heyran olduqlarını  bildirirdilər.
Bayram tədbirində  iştirak  edən  rayon icra hakimiyyətinin  başçısı İslam Rzayev  hamı ilə səmimi  görüşdükdən  sonra  ayrı-ayrı  iş adamlarının, fermerlərin  təşkil etdiyi  sərgi ilə  tanış oldu, onlara  bu il də bol və keyfiyyətli  məhsul  yetişdirməyi arzuladı.
Rayon rəhbərinin bayram təbrikindən sonra  bayram tədbiri incəsənət  ustalarının  konsert proqramı ilə davam etdi.