Körpələr evi-uşaq bağçalarında bayram tədbirləri keçirilib

25.12.2015-ci il tarixdə    Balakən şəhər R.Səmədov adına 2 saylı və Gərəkli kənd  körpələr evi-uşaq bağçasında  “31 dekabr Dünya Azərbaycanlılarının həmrəyliyi günü” və “Yeni il bayramı” münasibətilə bayram şənliyi keçirilib. 
Tədbirdə çıxış edən Balakən rayon İcra Hakimiyyətinin başçısı İslam Rzayev bildirib ki, ulu öndər Heydər Əliyevin müəllifi olduğu azərbaycançılıq ideologiyası nəinki azərbaycanlıları, ölkəmizdə yaşayan bütün xalqları, dünyada yaşayan soydaşlarımızı vahid ideya ətrafında  birləşdirib. Əminliklə demək olar ki, bu gün dünyanın harasında yaşamasından asılı olmayaraq, hər bir azərbaycanlı Azərbaycan dövlətini özünün Vətəni hesab edir və ölkəmizi dünyada təbliğ edir. Azərbaycanlılar öz dövlətinin olmaları ilə qürur duyur və sahibi olduqları ölkəninin inkişafı üçün bütün addımları atır. Bunun nəticəsində də Azərbaycanın dünyanın ən dinamik inkişaf edən ölkələrindən birinə çevrilib.
Uşaqları “31 dekabr - Dünya Azərbaycanlılarının Həmrəyliyi günü” və “Yeni il bayramı” münasibətilə təbrik edən İslam Rzayev onlara can sağlığı, sevinc və heç zaman onların simalarından uşaq təbəssümünün, xoşbəxtliyinin əksik olmamasını arzulayıb.
     Daha sonra uşaqların ifasında söylənilən Yeni İlə həsr olunmuş şerlər,  mahnılar, eləcə də  nümayiş etdirilən   milli  və xarici  rəqs nömrələri  alqışlarla qarşılanıb. Balacaların nümayiş etdirdiyi yeni il səhnəcikləri  maraqla izlənilib.
Tədbirdə  şaxta babanın və qar qızın hədiyyələrlə şənliyə gəlməsi, uşaqların bayramını təbrik edərək hədiyyələr paylaması və  uşaqlarla  rəqs  etməsi onların daha da  sevincinə səbəb olub.