86 hektar sahədə tütün əkiləcək

Vaxtı ilə Balakən respublikamızda  ən çox  tütün istehsal  edən rayonlardan  biri olub. Bu sahədə  çalışan  kənd əməkçiləri  tütün satışından əldə  edilmiş  yaxşı  gəlirlə  oğul evləndirib,qız  köçürüb,ailənin  bir sıra  zəruri  ehtiyaclarını  ödəyib.
Respublikamızda, o cümlədən   rayonumuzda kolxozlar ləğv  olunandan sonra , eləcə də  quru tütünün alış qiymətinin  son dərəcə  aşağı  olması  səbəbindən  əhalinin  tütünçülüyə  olan marağı demək olar ki, sıfır  səviyyəsinə  düşdü.
Sevindirici haldır ki, tütün istehsalı  sahəsindəki  durğunluğa,  nəhayət ki , son  qoyulur. Rayon İcra hakimiyyəti  tərəfindən  aparılan  izahat işləri  və tütün  istehsalı ilə məşğul olmaq  istəyənlərin toxuma  və polietilen örtük  materialına  olan  tələbatının ödənilməsi  sahəsində  görülən  işlər öz müsbət  nəticəsini  verməkdədir. Cari ildə 86 hektar sahədə  tütün  əkilməsi ilə bağlı  istehsalçılarla  müqavilə  bağlanmışdır. 1 kiloqram  birinci növ  quru tütünün  alış qiyməti  isə artırılaraq 2 manata  çatdırılmışdır.
Halbuki  ötən il bu  qiymət  1 manat  20 qəpik idi.
Tütün istehsalı  ilə məşğul  olmaq  istəyənlər  kənd  inzibati  ərazi dairəsi üzrə  nümayəndəliklərə  müraciət etməli,onların  toxuma  və polietilen  örtüyə  olan tələbatı  dərhal  ödənilməlidir.