“Balxurma” MMC-nin yeni emal müəssisəsi istifadəyə verilib.
Dekabrın 22-də “Balxurma” Məhdud Məsuliyyətli Cəmiyyətinin Balakən rayonunun Katex kəndində yeni fəaliyyətə başlayan meyvə və giləmeyvələrin quru və yarımquru emalı müəssisəsinin açılış mərasimi olub.
Tədbirdə çıxış edən Balakən rayon İcra Hakimiyyətinin başçısı İslam Rzayev xurmanın Balakəndə ən çox istehsal edilən və bol məhsul verən meyvəçilik sahələrindən biri olduğunu bildirib. Balakən xurmasının dadına, növlərinə, keyfiyyətinə görə digər rayonlarda yetişən xurmadan fərqləndiyini vurğulayan icra hakimiyyətinin başçısı hazırda rayonda mövcud xurma bağlarının ümumi sahəsinin 843 hektar təşkil etdiyini diqqətə çatdırıb. Bildirilib ki, 2017-ci ildə rayonda 15 min tondan çox xurma istehsal olunub. Sovetlər dövründə isə bu göstərici 25 min ton təşkil edirdi.
Qeyd edilib ki, məhsulun satışında yaranan problemlər səbəbindən son illər əhalinin xurma istehsalına marağı azalmışdı. Hər il yüz tonlarla məhsul xarab olurdu. Xurmanın şöhrətini özünə qaytarmaq, məhsul istehsalını daha da stimullaşdırmaq və sahibkarların bu sahəyə diqqətini artırmaq məqsədilə 2017-ci il noyabrın əvvəlində Balakəndə keçirilən “Xurma festivalı”ndan sonra əhalinin xurma ağaclarının əkininə marağı xeyli artıb.
Sonra tədbir iştirakçıları müəssisənin emal prosesi ilə yaxından tanış olublar. Bildirilib ki, emal müəssisəsi müasir standartlara cavab verən avtomatlaşdırılmış texniki avadanlıqla təchiz olunub. Müəssisədə emal olunan xurma və digər meyvələr Balakən rayonunun sakinlərinin şəxsi bağlarından yığılan tam gigiyenik və ekoloji cəhətdən təmiz məhsullardır. Burada istehsal olunan məhsullar daxili bazarla yanaşı, MDB, həmçinin bir-sıra Avropa və ərəb ölkələrinə ixrac ediləcək. Bununla da təsərrüfat sahibləri öz məhsullarını yerli bazarlarda satmaqla yanaşı, xarici bazarlara da çıxarmaq imkanı qazanacaqlar.
Hazırda müəssisədə 70 nəfər rayon sakini işlə təmin olunub. Gələcəkdə işçilərin sayının 150 nəfərə çatdırılması nəzərdə tutulur.
Xatırladaq ki, cari ilin sentyabrında Moskva şəhərində keçirilən "WorldFood Moscow" Beynəlxalq Ərzaq Sərgisində "Made in Azerbaijan" vahid ölkə stendində öz təbii və keyfiyyətli məhsulları ilə ziyarətçilərin və sərgi təşkilatçılarının diqqətini cəlb edən "Balxurma" 2017-ci ilin məhsulu nominasiyası üzrə qızıl medala layiq görülüb.
