Əhalinin kəndlərdə səyyar qəbulları qrafikə uyğun davam edir

Aprelin 9-da RİH-nin başçısı İslam Rzayevin növbəti səyyar qəbulu 3664 nəfər əhali olan Qaysa kəndində oldu. Rayon rəhbəri kənddə yeni tikilmiş məktəbin geniş iclas zalında  əyləşmiş kənd ictimaiyyətinin nümayəndələrini səmimi  salamladıqdan sonra qeyd etdi ki, keçən ilin dekabr  ayında olan səyyar qəbuldan sonra kənddə xeyli iş  görülmüşdür. Ən əsası odur ki, ən vacib sosial problem həll edilmiş, kəndə qaz çəkilmişdir. Kəndin  mərkəzi küçəsinə asfalt döşənmişdir. Zəlzələdən ziyan  çəkmiş insanlara da kömək göstərilir. Qəzalı vəziyyətə düşmüş  24 ev yenidən tikilir.
Qəbulda olan kənd sakinlərindən Məhəmməd Əlibəyov son bir ildə kəndin abadlaşdırılması istiqamətində aparılan işlərə görə rayon rəhbərliyinə təşəkkür etdi. Eyni zamanda 35 min əhali yaşayan Qabaqçöl zonasında yanğından mühafizə stansiyasının yaradılmasının vacibliyini vurğuladı. Ayşa Çunayeva  zəlzələ zamanı uçmuş evinin yerində yeni ev tikildiyinə, digər ziyan çəkən kənd sakinlərinə hərtərəfli köməklik olunduğuna görə  ölkə prezidentinə dərin təşəkkürünü bildirdi . Şamil Oynağanov və Kamil Xəlilov lisenziya olmadan qazılan  balıq göllərinin  ucbatından əkin sahələrinin yararsız vəziyyətə düşməsindən gileyləndilər. Ramazan Osmanov kəndin Masrabgirmə yaşayış məntəqəsində içməli su üçün artezian quyusunun qazılmasına köməklik göstərilməsini xahiş etdi.
Görüşdə iştirak edən Azərbaycan Respublikası Prezident Administrasiyasının məsul işçisi Əflatun Rufiyev öz çıxışında qeyd etdi ki, əvvəlki illərdən fərqli olaraq indi böyük həcmli -hamını narahat edən  işıq, su, qaz problemlərindən, kənd  məktəbinin, uşaq baxçalarının pis vəziyyətdə olması barədə söhbət getmir. Bu, sevindirici haldır. Hamı razıdır ki, ölkə prezidenti cənab İlham Əliyevin regionlara böyük diqqəti  sayəsində kəndlər günü-gündən  abadlaşır.
  Keçən il baş verən zəlzələnin səhərisi günü ölkə prezidentinin bu bölgəyə səfəri, ziyan  çəkən insanların evlərinin tikilməsi və bərpası  üçün böyük məbləğdə  vəsaitin ayrılması xalqa göstərilən qayğıya əyani sübutdur.
Lakin insanlar da hər şeyi dövlətdən gözləməli deyillər. Həyat  şəraitinin yaxşılaşması kənd əhalisinin özündən də çox asılıdır. Kənd təsərrüfatının inkişafı, əkinçilikdə və heyvandarlıqda yüksək məhsuldarlığa nail olmaq üçün mütərəqqi üsullardan istifadə etmək lazımdır.
Balakənlilər həmişə dövlətçiliyə sədaqətli insanlar olublar. Şübhə yoxdur ki, bu il keçiriləcək prezident seçkilərində də  fəal iştirak edəcəklər.