Rayon icra hakimiyyətinin başçısı İslam Rzayev Qullar kəndində səyyar qəbul keçirib
16 yanvar 2024 | 15:57
Rayon icra hakimiyyətinin başçısı İslam Rzayev yanvarın 16-da Qullar kəndində səyyar qəbul keçirib. Qəbulda hüquq-mühafizə orqanlarının, xidmət təşkilatlarının rəhbər işçiləri və kənd sakinləri iştirak ediblər.
Balakən Rayon İcra Hakimiyyətinin başçısı İslam Rzayev səyyar qəbulda çıxış edərək ötən 2023-cü il ərzində ölkəmizin həyatında baş vermiş önəmli hadisələrdən bəhs edib, sosial-iqtisadi sahədə həyata keçirilən mühüm tədbirlərdən söz açıb, rayonda görülən işlərdən, qarşıda duran vəzifələrdən danışıb.
Sonra kənd sakinlərinin müraciətlərinə baxılıb. Üzeyir Qardaşov kənd məscidinin yaxınlığındakı asfalt yolda yaranmış çalaların təmir olunmasına, Nemət Süleymanov kəndin “Calğalar” adlanan ərazisinə optik internet xəttinin çəkilməsinə, çöl yolunun zibildən təmizlənilməsinə, Həybullah Qardaşov qəzalı elektirik dayaqlarının yenisi ilə əvəz olunmasına, Vəfa Qudulova kəndin “Təpənin yanı” adlanan ərazisindəki ara yolların təmir edilməsinə, Ramiz Novruzov kəndin “Göygöl” adlanan ərazisindən yuxarıdakı 3 km uzunluğunda yolun təmir edilməsinə, Ələsgər Saramanov əvvəlki iş yeri olan “DOST” İş Mərkəzindəki işinin bərpasına, Zahidə Yusifova torpaq kadastrı ilə bağlı sənədlərinin düzəldilməsinə köməklik göstərilməsini xahiş ediblər.
Rayon rəhbəri sakinləri narahat edən məsələlərin həlli ilə bağlı aidiyyəti vəzifəli şəxslərə müvafiq tapşırıq və tövsiyələr verib.
Vətəndaşlar problemlərinin həlli istiqamətində göstərilən diqqət və qayğıya görə ölkə rəhbərliyinə minnətdarlıqlarını bildiriblər.
Keçidlər
